Genesis 50
1UJosefa wazilahlela phezu kukayise wamkhalela, wamanga. 2Yikho uJosefa waselaya izinyanga ezazingaphansi kwakhe ukuqhola umzimba kayise u-Israyeli. Yikho izinyanga zamqhola, 3zathatha izinsuku ezingamatshumi amane ezigcweleyo, ngoba kwakuthatha isikhathi esingako ukuqhola. AmaGibhithe amlilela izinsuku ezingamatshumi ayisikhombisa. 4Izinsuku zokulila sezedlule, uJosefa wathi kwabomphakathi kaFaro, “Uma ngifumane umusa kini, ngikhulumelani kuFaro. Mtsheleni lithi, 5‘Ubaba wangifungisa isifungo wathi, “Sengizakufa; lingimbele ethuneni engazigebhela lona mina ngokwami elizweni laseKhenani.” Manje-ke ake ungivumele ngihambe ngiyongcwaba ubaba; ngibe sengibuya.’ ” 6UFaro wathi, “Hamba uyongcwaba uyihlo, njengoba wakufungisa ukuthi uzakwenza.” 7Ngakho uJosefa wahamba wayangcwaba uyise. Zonke izikhulu zikaFaro zamphelekezela – izikhulu zakhe zomphakathi kanye lazo zonke izikhulu zaseGibhithe – 8ngaphandle kwabo bonke abendlu kaJosefa labafowabo lalabo ababe ngabendlu kayise. EGosheni kwasala kuphela abantwana lemihlambi yabo yezimvu leyezinkomo. 9Wahamba elezinqola zempi labakhweli bamabhiza. Kwakulixuku elikhulu. 10Bathi ngokufika esizeni sika-Athadi eduze kweJodani basiqhinqa isililo esikhulu esibuhlungu; kwathi khonapho uJosefa wazilela uyise okwezinsuku eziyikikhombisa. 11Kwathi amaKhenani ayehlala eduzane ebona ukulila lokho esizeni sika-Athadi athi, “AmaGibhithe alenkonzo yawo yokulila.” Yikho nje leyondawo eduze kweJodani ithiwa yi-Abeli Mizirayimi. 12Ngalokho amadodana kaJakhobe enza lokho uyise abalaya khona: 13Bamthwalela elizweni laseKhenani bayamgcwaba ebhalwini olwalusensimini kaMakhaphela, eduze leMamure, u-Abhrahama aluthenga kanye lensimu ku-Efroni umHithi ukuthi kube yindawo yokungcwaba. 14Esemngcwabile uyise uJosefa wabuyela eGibhithe, kanye labafowabo labo bonke ababehambe laye ukuyangcwaba uyise.UJosefa Ubeka Abafowabo Isibindi
15Abafowabo bakaJosefa sebebona ukuthi uyise wayesefile, bathi, “Kambe uJosefa kasibekelanga isikhwili yini abesefuna ukuphindisela ngakho konke esamona ngakho?” 16Yikho basebethumela ilizwi kuJosefa besithi, “Uyihlo watshiya imilayo le engakafi: 17‘Nanku elimele likutsho kuJosefa: Ngiyakucela ukuthi uxolele abafowenu izono leziphambeko abazenzayo ngokukuphatha kubi kangaka.’ Manje siyacela ukuthi uthethelele izono zezinceku zikaNkulunkulu kayihlo.” Kwathi ilizwi labo selifikile kuye uJosefa wakhala. 18Abafowabo beza bafika bazilahla phansi phambi kwakhe. Bathi, “Siyizigqili zakho.” 19Kodwa uJosefa wathi kubo, “Lingesabi. Mina ngisesikhundleni sikaNkulunkulu na? 20Laliqonde ukungikhubaza, kodwa uNkulunkulu wayehlose ngakho ubuhle ukuze kugcwaliseke lokhu okwenzakalayo manje, ukuphephisa izimpilo. 21Ngakho-ke lingesabi. Ngizalinakekela lina labantwabenu.” Wababeka isibindi wabakhulumisa ngomusa.Ukufa kukaJosefa
22UJosefa wahlala eGibhithe kanye labo bonke abendlu kayise. Waphila okweminyaka elikhulu letshumi 23wabona isizukulwane sesithathu sabantwana baka-Efrayimi. Njalo labantwana bakaMakhiri indodana kaManase bathi bezalwa babekwa emadolweni kaJosefa. 24UJosefa wasesithi kubafowabo, “Sengiseduze lokufa. Kodwa ngempela uNkulunkulu uzalisiza alikhuphe kulelilizwe alise elizweni alithembisa ngesifungo ku-Abhrahama, lo-Isaka loJakhobe.” 25UJosefa wasefungisa amadodana ka-Israyeli isifungo wathi, “UNkulunkulu uzalisiza, yikho kumele lithwale amathambo ami lisuke lawo kule indawo.” 26UJosefa wasesifa eseleminyaka yobudala elikhulu letshumi. Bathi sebemqholile, isidumbu sakhe basibeka ebhokisini eGibhithe.
Copyright information for
NdeIBE